David Məmmədov

David Məmmədov
Şəxsi məlumatlar
Doğum tarixi	1955
Doğum yeri	Kürdəmir, Kürdəmir rayonu, Azərbaycan SSR, SSRİ
Partiya	Yeni Azərbaycan Partiyası
Təhsili	Azərbaycan Dövlət Neft və Sənaye Universiteti
Fəaliyyəti	siyasətçi
Təltifləri

David Niyazi oğlu Məmmədov — Azərbaycanın əməkdar mühəndisi (2005), Azərbaycan Respublikası Dövlət Neft Şirkətinin emal üzrə vitse-prezidenti (2005–2021).

Həyatı və fəaliyyəti

David Məmmədov 1955-ci ildə Kürdəmir şəhərində anadan olmuşdur. 1980-ci ildə M. Əzizbəyov adına Neft və Kimya İnstitutunu (Azərbaycan Dövlət Neft Akademiyası) "Neftin və qazın kimya texnologiyası" ixtisası üzrə bitirmişdir.

Əmək fəaliyyətinə 1976-cı ildə Vladimir İliç adına Yeni Bakı neft emalı zavodunda başlamışdır. 1994-cü ilədək Yeni Bakı neft emalı zavodunun operatoru, qurğu rəisi, sex rəisinin müavini, sex rəisi, şöbə rəisi vəzifələrində işləmişdir. 1994–2005-ci illərdə "Azərneftyanacaq" İB-nin baş direktorunun birinci müavini-baş mühəndis, Heydər Əliyev adına Bakı neft emalı zavodunun baş mühəndisi olmuşdur.

2005–2021-ci illərdə Azərbaycan Respublikası Dövlət Neft Şirkətinin emal üzrə vitse-prezidenti vəzifəsində çalışmışdır.

2005-ci ildə "Azərbaycan Respublikasının əməkdar mühəndisi" fəxri adına layiq görülmüş, 2010-cu ildə "Tərəqqi" medalı ilə təltif edilmişdir. Yeni Azərbaycan Partiyasının üzvüdür.